बैशाख ३० काठमाडौ – निर्वाचन आयोगले पूर्वप्रधानमन्त्री तथा जसपाका संघीय परिषद् अध्यक्ष बाबुराम भट्टराईलाई २४ घण्टे स्पष्टीकरण सोधेको छ।
मतदान गर्ने क्रममा भट्टराईले मत संकेत स्पष्ट देखाएर खिचेको तस्बिर सामाजिक संजाल सार्वजनिक गरेपछि आयोगले स्पष्टीकरण सोधेको हो । भट्टराईले फेसबुकमा `गोरखाको पानपा-१ अन्नपूर्ण मावि बूथमा विहान ८.२५ बजे मतदान गरियो। भनेर सार्वजनिक गरेका थिए। तर अहिले मत संकेत गरिएको फाेटाे भने भट्टराईले हटाइसकेका छन।
उक्त पत्रमा `यहाँलाई मतदान गर्ने क्रममा मत संकेत गर्ने ठाउँमा कोही अर्को व्यक्तिलाई साथ लैजानु हुँदैन भन्ने जानकारी थियो, थिएन ? यहाँ देशको पूर्वप्रधानमन्त्री र जिम्मेवार दलको नेताले मत संकेत गर्ने गोप्य कक्षमा के कसरी कुनै अर्को फोटो खिच्ने व्यक्ति साथ लानुभएको थियो ? यहाँले मोबाइल वा क्यामेरा के कसरी गोप्य कक्षमा लानु भयो ?,’ भन्ने उल्लेख गर्दै आयोगले भट्टराईलाई सोधेको छ।
‘मत संकेत गर्ने गोप्य कक्षमा फोटो खिच्ने कुनै सामग्री लान नहुने र मत संकेत गरेको मतपत्रको फोटो खिच्न नहुने कानुनी व्यवस्थाको अवज्ञा गर्दै के कति कारणले निसिद्ध स्थानमा लान नमिल्ने सामग्री मार्फत फोटो लिन लगाई सो फोटो सार्वजनिक गर्नु भएको हो ?’
भट्टराईलाई निर्वाचन कसुर तथा सजाय ऐन, २०७३ को दफा ७ को उपदफा २ बमोजिम किन कारबाही गर्नु नपर्ने हो ? भनेर आयोगले प्रश्न गरेको छ । पत्र प्राप्त भएको मितिले २४ घण्टाभित्र जवाफ पेस गर्न आयोगले समय दिएको छ।
