फागुन १६, सल्यान – सल्यानमा १३ औं जिल्ला स्तरीय राष्ट्रपति रनिङ शिल्ड प्रतियोगिता शुरु भएको छ ।
‘राष्ट्रका लागि खेलकुद, स्वास्थ्यका लागि खेलकुद’ भन्ने नाराका साथ सोमबारदेखी जिल्लाको बागचौर नगरपालिका वडा नं. २ थारमारेमा रहेको जनकल्याण माविको प्राङ्गणमा जिल्ला स्तरीय रनिङ शिल्ड प्रतियोगिता शुरु भएको हो ।
राष्ट्रपति रनिङ शिल्ड प्रतियोगिताको उद्घाटन गर्दै पुर्वसभामुख तथा नेकपा माओवादी केन्द्रका केन्द्रिय उपाध्यक्ष कृष्ण बहादुर महराले स्वास्थ्य तन्दुरुस्त, निरोगी र यो देशको नाम उच्च राख्नका लागि खेलको महत्त्व रहेको बताए । उनले देशको विकास र समृद्धिको लागि सक्षम नागरिकको आवश्यक भएकोले नै देशव्यापी रुपमा रनिङ शिल्ड भएको बताए । साथै सम्पुर्ण खेलाडीहरुलाई राष्ट्रसम्म खेलहरुमा भाग लिने गरि खेल खेल्नका लागि शुभकामना व्यक्त गरे ।
यस्तै प्रतिनिधिसभा सदस्य प्रकाश ज्वालाले खेललाई मनोरञ्जनका लागी मात्रै नभएर आफ्नो स्वास्थ्य र राष्ट्रको गौरवका रुपमा लिनुपर्ने बताए । अध्ययनबिना खेलक्षेत्रमा अघि बढ्न विद्यार्थीलाई कठिन हुने भएकाले अनुशासन, लगनशील र मेहनतका साथ खेलखेल्न खेलाडीलाई अनुरोध गरे । उनले खेल खेल्ने सबै खेलाडीले जित्ने आत्मविश्वासका साथ खेल खेल्नु पर्ने र प्रतिस्पर्धाकाबिच बाहिरिए पनि सधैंको निम्ति अवसर गुम्यो भन्ने नसोचेर अर्कोपटक जित्नका लागि अगाडि बढ्न अनुरोध गरे ।
त्यस्तै कार्यक्रममा बोल्दै कर्णाली प्रदेश सरकारका भूमि व्यवस्था, कृषि तथा सहकारी मन्त्री भिमप्रकाश शर्माले खेलाडीको प्रोत्साहन र खेल क्षेत्रको विकासको लागि खेलकुदमा लगानी गर्न आवश्यक रहेको बताए । उनले खेलकुद कार्यक्रम खेलाए पनि यसको लागि सरकारले सहि व्यवस्था गर्न नसकेको भन्दै आफुहरु लागि पर्ने जनाए ।
यस्तै सल्यान प्रदेशसभा (ख) बाट निर्वाचित प्रदेशसभा सदस्य सुरेश अधिकारीले खेलकुदले विद्यार्थीको प्रतिभालाई निखारपन दिने भएकाले खेललाई निरन्तरता दिनुपर्ने जनाए । उनले खेलबाट पनि सल्यानको नाम राष्ट्रसम्म चलेको भन्दै आझै थप राष्ट्रिय खेलाडी उत्पन्न हुनका लागि शुभकामना व्यक्त गरे ।
बिहीबारसम्म संचालन हुने प्रतियोगितामा जिल्लाका दश वटै पालिकाका खेलाडीहरु सहभागी भएका छन् । प्रतियोगितामा विभिन्न विधाका करिब ५ सय खेलाडी सहभागि भएका छन् ।
जिल्ला खेलकुद विकास समिति सल्यानका अध्यक्ष खड्ग आचार्यको सभाध्यक्षतामा भएको कार्यक्रममा स्वागत मन्तव्य सदस्य सचिव तुफान वली गरेका हुन भने कार्यक्रमको सहजीकरण कार्यालय प्रमुख शिवराज अधिकारी गरेका थिए ।
