भाद्र १५ महाेत्तरी – नेपालमा कोरोना भाइरस संक्रमणबाट पहिलो पटक स्वास्थ्यकर्मीको ज्यान गएको छ। जिल्ला स्वास्थ्य कार्यालय महोत्तरीका अनुसार मनरा सिसवा-४ निवासी ४० वर्षीय हेल्थ असिस्टेन्टको तीन दिनअघि मृत्यु भएको हो

कोरोना संक्रमण पुष्टि भएर गम्भीर बिरामी परेका उनलाई उपचारका लागि महोत्तरीबाट काठमाडौं ल्याउँदै गर्दा काभ्रेस्थित भकुन्डेबेंसी क्षेत्रमा ज्यान गुमाएका हुन्।

गाउँमै औषधि पसल चलाइरहेका उनी बिरामीको सेवामा सक्रिय थिए। त्यसै क्रममा उनी बिरामी परेका थिए। भदौ ७ मा बिरामी परेपछि उनको केही दिन गाउँमै उपचार भएको थियो।

तर त्यहाँ अवस्था झन् गम्भीर भएपछि थप उपचारका लागि काठमाडौं ल्याइएको थियो। जिल्ला स्वास्थ्य कार्यालय महोत्तरीका प्रमुख नगेन्द्रप्रसाद चौधरीले उनको ज्यान गइसकेपछि काठमाडौंमै गरिएको स्वाब परीक्षणमा कोरोना पुष्टि भएको बताएका छन्। उनको सूर्या हेल्थे केयर अस्पताल लाजिम्पाटमा गरिएको परीक्षणमा कोरोना देखिएको थियो।

ज्यान गुमाएका स्वास्थ्यकर्मीमा मधुमेह थियो भने स्टोन पनि देखिएको थियो। प्रदेश २ सरकारका कोभिड फोकल पर्सन विजयकुमार झाले पनि उनको कोरोनाका कारण ज्यान गएको पुष्टि गरेका छन्।

मनरा सिसवा नगरपालिका सूचना प्रविधि अधिकृत आलोक कुमार सहनीले कोरोना संकटबीच पनि उनी गाउँगाउँ पुगेर बिरामीको सेवामा जुटेका थिए। ‘उहाँ सरकारी कर्मचारी त होइन, तर कोरोना संकटमा पनि उहाँले गाउँ गाउँमा पुगेर धेरै बिरामीको सेवा गर्नुभएको थियो’, उनले भने, ‘घरमै रहेको क्लिनिकमा पनि यो बीचमा उहाँले कयौँ बिरामीको उपचार गर्नु भएको थियो। उहाँलाई बिरामीको उपचारकै क्रममा कोरोना संक्रमण भएको हुन सक्छ।’

सहनीका अनुसार ज्यान गुमाएका हेल्थ असिस्टेन्ट गाउँमा लोकप्रिय थिए। ‘सेवाभाव राखेर गाउँ गाउँमा भनेका बेला पुग्‍ने गरेकाले उहाँ लोकप्रिय हुनुहुन्थ्यो’, उनले भने, ‘तर कोरोनाकै कारण उहाँले ज्यान गुमाउन पुग्‍नु भयो। बिरामीको सेवा गर्दा गर्दै उहाँको निधन भएको छ।

श्रीमती पनि गम्भीर बिरामी

ज्यान गुमाएका स्वास्थ्यकर्मीकी श्रीमती पनि कोरोनाकै कारण गम्भीर बिरामी परेकी छन्। उनको अहिले सूर्या हेल्थ केयर अस्पताल काठमाडौंमा उपचार भइरहेको छ। पारिवारिक स्रोतका अनुसार उनलाई भेन्टिलेटरमा राखेर उपचार गरिँदैछ।

उनको पनि सूर्या हेल्थ केयर अस्पतालमा गरिएको परीक्षणमा कोरोना पोजेटिभ देखिएको थियो। स्वास्थ्य तथा जनसंख्या मन्त्रालयले भने कोरोनाका कारण  अहिलेसम्म याे बाहेक अन्य स्वास्थ्यकर्मीको मृत्यु भएको बारेमा कुनै जानकारी आइनसकेको बताएको छ।

प्रकाशित मिति : २०७७ भाद्र १५ गते सोमवार